تقرقيب الناب…المدارس الخاصة والواجب الشهري
بقلم : دليل نجاح
المدارس الخاصة تخلصو من الاباء فشهر مارس وشدو فلوسو وديكلاراو 50000 معلم ومعلمة متوقفين عن العمل لتضرر المدارس الخاصة من الجائحة ، ضرب 50000 ف 1000 درهم تاع التعويض لي تعطات فشهر مارس للمتوقفين عن العمل وحسب شحال ضاع من صندوق مكافحة الجائحة ظلما وعدوانا بسباب ارباب المدارس الحرة لي شادين لفلوس وكيقولو انهم متضررين.
ماااعلينا هذا كان غ مثال فقط لما هو عليه الوضع حاليا فالمغرب كلشي باغي ينهب من صندوق مديور باش يعتق لبلاد باش مطيحش
كاينا 216000 اونتروبغيز اي مقاولة مابين الكبيرة الصغيرة والمتوسطة لي تعتبر Affilier ف ال cnss اي مقيدا وعندها L’affiliation تاعها وكديكلاري بالخداما تاعها
من بينهم 131955 لي ديكلاراو انهم توقفو ووقفو نشاطهم جراء الجائحة وانهم متضررين يعني من بين 2 ت لمليون و 600 الف عامل فالقطاع الخاص لي مسجلة فال cnss كاينا 808199 عامل تم تسجيل توقفهم عن العمل فشهر مارس ، وخداو 1000 درهم ، خلي داكشي لي حسبتي فاللول وعاود حساب جديد وضرب هاد المرة 808199 شخص ضربها ف 1000 درهم وحسب شحال تاع لفلوس مشات من الصندوق غ فشهر مارس
ارقام كتخلع ومبالغ مكايجمعها غ الفم ووضع سينعكس سلبا على لبلاد كاملا الله يحفض
صراع كبير وكبير جدا يدور فالخفاء معالم بيه حد وهو صراعة مابين الدولة واقولها الدولة وبين الباطرونا ومالين الشكارا كيفما كنسميوهم ، الدولة بغاتهم يكونو عندهم حس المواطنة ويوقفو مع لبلاد فهاد المحنة انما مول الشكارة كتهمو غ شكارتو وفقط لا غير
المنعشين العقارين بداو كيتاصلو بالناس لي دايرين حجزات عندهم ودافعين فبرطمات وكيقولو ليهم جيبو لكمالا او غنشطبو على سميتك من الحجز وغنعطيو لبرطما لواحد خور ، خاصة اصحاب السكن الاقتصادي لي فلكونطرا لي كيسينيو عليها فالاول فيها بند فيه انه ايلا لغيتي الحجز تاعك او تعطلتي مكملتيش لفلوس او مجبتيش موافقة البنك لي غتعطيك لكريدي او بدلتي رأيك مبقيتيش باغي تشري
التسبيق لي دفعتي غتمشي ليك منو 20% وخا تكون مصبق 20 مليون وباقيا ليك غ خمسة ، وحسب شحال ت لفلوس هاديك غتمشي ظلما وعدوانا للناس لي هوما اصلا متوقفين عن العمل ولحصيصا لي كانو جامعين دفعوها تسبيق فقبر الحياة
المنطقة الصناعية فالقنيطرة شركات فيها غتبدا الخدمة نهار الاثنين وعلمو لخداما باش يجيو ليبوسط تاعهم ، لي ملتاحقش لمدة ثلاثة ايام سيعتبر متغيب وغتقطع ليه من لخلصة زاد النهار الرابع مجاش يعتبر انه ديبار وتطبق عليه الفصول تاع التخلي عن العمل وغيجلس بلا حساب بلا solde tout compte بلا والو يعني لباب ، وخا يكون ساكن فطانطان ومعندو فاش يجي شغلو هداك عاطينك ثلاث ايام وخا تضربها على رجليك وجي تخدم
ال cnss كتتسنى مشروع قانون غيصوت عليه البرلمان نهار 21/3 عاد غتفتح باب تسجيل المتوقفين عن العمل فشهر ابريل ولي غيتخلصو 2000 درهم من الصندوق ، لانها لقات خروقات كثيرة جدا تم ضبطها ، ولقات شركات دارو مع العمال تاعهم انهم يخدمو والشركة غديكلاري لل cnss انهم متوقفين عن العمل ، والشركة غتخلص العامل فشهرو وغتنقص ليه 2000 درهم من خلصتو وتخلي ال cnss هي ليتعطيها ليه ، وحسب شحال من 2000 درهم باغين يشيطو مالين الشكارا ويخليو الدولة تتحملها ، هو شركتو خداما مواقفاش وجيبو كيعمرو والدولة تخلص ليه العمال
مشروع القانون لي محطوط فلبرلمان للتصويت ولي غنهضرو عليه من بعد ، تدار كحل انما قدما فيه من الحلول فيه من المشاكل وبالجملة وشد ليا نقطع ليك غتزيد مع هاد القانون ، والشركات لي مغتنطابقش عليها المعاير لي غتخليها تدخل فخانة المتضرر من الجائحة ، خصها ترجع ال 1000 درهم لي خداو العمال لي ديكلاراتهم فمارس وفييييلم غنعيشوه تاني عوتاني.