بالدارجة..أربع نصائح مهمة جدا لكل أب وأم خصهم يطبقوها مع ولادهم
دليل جناح
ف فرنسا 10000 طفل يتعرض لاعتداء جنسي فكل عام 6000 منهم يتم اغتصابهم بمعدل 20 طفل يتم اغتصابه فاليوم وهادي ارقام رسمية ماشي غ هضرة وكلام ، وف 94% من الاعتداءات الجنسية على الاطفال كايكون الجاني اما من المحيط العائلي او جيران او احد افراد الاسرة يعني كايكون الطفل موالف يشوفو وحسب ال National Center for Victims of Crime ف بنت على سبعة و ولد على 25 يتم الاعتداء عليهم جنسيا في سن مبكر قبل بلوغهم ال 18 سنة.
ارقام كتخلع ياك وربما عمرك عرفتيها ، انما راها كاينا وموجودة وبكثرة غ يلاه بدات كتبان ليك دابا ، فقبل مندخلو فموضوع البيدوفيليا وعلاش وكيفاش وداكشي كاين اربع نصائح مهمة جدا لكل اب وام خصهم يطبقوها مع ولادهم لتفادي ان الولد او البنت يكونو ضحية شي اعتداء جنسي كيفما كان نوعو ، هاد النصائح غتقدر تجيك مضحكة او متجاوزة او مبالغ فيها لكن من غتفهم المغزى منها ومعناها غتلقاها مهمة جدا جدا.
اولا عمرك متسارا فالدار عريان قدام ولادك ، خاصة الام قدام الوالد والاب قدام البنت ، لانه فسن الطفولة الاطفال كايكون عندهم حب الاستطلاع وكايبغيو يعرفو ويكتاشفو ونتا كتسارا قدامهم عريان ضروري مغايسولوك او يتساءلو على الاختلاف لي بيناتكم ، لذلك عمرك متسارا عريان قدام ولدك او بنتك لانه غايقلدك بدورو وتانيا غ يجيه التواجد مع شخص عاري تماما في نفس المكان امر عادي ومقبول ويتعرا قدامو اي واحد خور غريب عليه غتجيه عادية ومقبولة وغتكون ساهمتي فانك خلقتي طفل قابل للغير مقبول وهو واحد كبير عريان ومتواجد معاه بنفس المكان.
تانيا عمرك تخلي الطفل يقيص اعضاءك التناسلية لا الام مع بنتها او الاب مع ولدو ، ولا حتى نتا تقيصو فاعضاؤو التناسلية ، وخا تكون كتعوم فيه من توصل لاعضاء تناسلية قوليه هاك غسل راسك باش يتربى على انها مسألة شخصية متقيصني منقيصك فاعضاءك التناسلية ، وكذلك الام مع بنتها نفس الشئ ، وتكون الامور شديدة اللهجة ونتا كتشرح ليهم متقيص حد ومتخلي حد يقيصك فهاد المناطق نهائيا واي واحد قاصك او بغا يقيصك قولها ، هكدا خص الولد و البنت يترباو.
ثالثا تبدال لحوايج ايلا كان عندك ولد وبنت كلها يبدل حوايجو بوحدو معزول على الاخر ، نعم هي ختو وهو خوها لكن خصهم يفهمو من صغرهم انه كاينا واحد لحاجة كتسمى بالانتيميتي او الخصوصية مخصش يفرط فيها باش تكبر لبنت ويكبر الدري وهوما عندهم فكرة متعرى قدامي منتعرا قدامك.
رابعا واهم حاجة ، ديك القضية تاع سير بوس عمي سير بوس خالي وداكشي يتفاداه الانسان وحتى الجلوس على حجر او ركبة شي شخص بالغ وخا يكون جدو او احد اقاربه لانه غايولفها وتجيه عادية ويديرها مع من والا.
هادي اربع نصائح تقدر تجيك مضحكة لكنها مهمة جدا جدا ، شخصيا من وابني صغير فاش كتبغي تبدل ليه ماماه لكوش كتخرج ختو من لبيت وبقاو مربين على هاد الشي دابا بنتي كتبغي تبدل كتسد عليها لبيت انا ومكتخلينيش ندخل حتى تسالي وخوها كذلك ميخليكش تشوفو عريان فالدوش او كيبدل يغوت عليك ويقوليك بابا خرج.
مسائل بسيطة جدا قد تصنع الفرق لكن حنا مكنردوش ليها لبال..لبيدوفيليا داخلا عندك حتى للدار هذا هو موضوعي القادم ان شاء الله قرا هاد جوج منشورات باش تفهم الموضوع 👇…