كُنْتِي قْرِيبَة (زجل)

رحال لحسيني – موطني نيوز

 

يَاهْ..

اشْحَالْ كُنْتِي قْرِيبَة
وُكَنْتِي مَسْكُونَة بَالْفَرْحْ
وُ فْوَادْ الشُّوقْ ..

دَايْبَة

 

اشْحَالْ كُنْتِي قْرِيبَة
ضَدْ..

فِينْ يَجْرِي السِّيلْ

هَبَّاتْ رِيحْ
بْصُوتْ دِيبَة

 

عَيْنْ الرِّيبَة
سَاكْنَة الْگَاشُوشْ
مَاخَلاَّتَكْ
تْزَوْقِي
الَحْزَنْ
الْمَرْشُوشْ
بَعْطُورْ السِّيبَة

 

سَكْنَاتَكْ
مَاسَعْفَاتَكْ
تْظُفْرِي سْوَالْفَكْ لَحْبِيَبَة

 

عَلْمَاتْنِي عْيُونْ الزِّينْ
الْفَرْحَة صْعِيبَة

  

خَاطَرْ الْوَقْتْ
شِيبَة
فْرَاسْ طِيرْ
السّْعِيرْ
قَلْبَاتَكْ
لُوجِيبَة

 

الْحُلْمْ لْبَسْ الْغَمْ
الْخَاطَرْ تْزَعْزَعْ
بُوْجَاعْ

وُ مْحَايَنْ الْخِيبَة

 

غِيرْ سِيرْ
مَازَالْ يْجِي النَّايْرْ
يْرَفْرَفْ جْنَاحْ
الرّْبِيعْ

يْنُوبْ
يْنُوبْ الْخِيرْ

 

مْطَرْقَة

فْجُوفْ الَخْيَالْ
مَنْجَلْ
يَحْصَدْ الْمُحَالْ

 

الْحُلْمْ الْمَغْشُوشْ
مَاتْحَمْلُوشْ
هَاكْدَا دَايْرَا

تْخَبْلِي لَفْشُوشْ
تْشَعْشَعْ لُوْقَاتْ

صْعِيبَة

  

لِينِينْ-گْرَادَ..
(سانت بطرسبرغ)

سْتَالِينْ-گْرَادْ..
مُوسْكُو وَاللاَّتْ غْرِيبَة

 

الزَّنْزَانَة زَاهْيَة
بْلُولاَدْ
لاَزَمْ تْزَغْرَدْ

لَعْيَادْ

فَبْلاَدْ رْبِيبَة

 

كُلاَّ يْطَرَّزْ سَعْدُو
كُلا يْنَجْ بُوحْدُو
مَازَالْ يْجِيكْ

الضَّوْ
تْبَانْ الْهِيبَة

 

اشْحَالْ كُنْتِي قْرِيبَة… !