الفنان الكوميدي لكريمي..فارس الحلقة..ولسان حال البسطاء

دليل جناح

لكريمي الله يرحمو مكانش مجرد كوميدي لكريمي كان جزء من ذاكرة المغرب ، لكريمي هو الاصل والجدر لكريمي هو ريحة التراب لكريمي هو وقت الحصاد والصابة لكريمي هو وقت الشتا قليلة لكريمي هو المغرب الحقيقي لي مكايعرفو حد ، لكريمي هو المغرب بلا زواق

مايمكنش ليك تعرفو شكون ايلا عمرك محضرتي للحلقة فالسوق ، اسبوع وبنادم كايضرب فتمارة فلارض ولبهايم والسرحة ولحصاد وكيتسنا نهار السوق بفارغ الصبر لانه هو المتنفس الوحيد ديالو ، غايمشي يتسوق يجيب لحيمات وخضيرة ويشرب اتاي ويتفرج فلحلقة ، هاد المغريب لي هادي هي حياتو لكريمي الله يرحمو كان هو المتنفس تاعو

هو لي كايهضر ليه على همومو وطموحاتو هو لي كايهضر ليه على الحاج مول لفيرما لي جا من الحج ودار لفيجطا وجاب الشيخات ويوريه التناقض كيداير ويقوليه مايغركش شحال عندو من قطار وشحال من راس راه جاي من بيت الله وداير الشيخات لي حرت الجمل دكو مدايم غ المعقول ، لكريمي هو لي كايهضر ليه على لمرا ويقوليه شد فيها بيديك وسنيك را حاملا وكتحرت معاك لارض كيجيها لوجه كتحزم قنبة فالسقف وتلوح ليك لبجغوط وتجمع الوقفة وتنوض تحلب ليك لبگرة ودخل لغنم اما بنت لمدينة مامنهاش شد فمرتك راك عندك النقرة الصافية

لكريمي هو لي كايدكر الفلاح المقهور بالله ملي يقوليه مدايم غ وجه الله وكلشي الى زوال وطريق الله هي كلشي مااااتغرك الدنيا ، لكريمي كايدكرو بالموت ويقوليه را غايوقف عليك لملاك وقوليه انا هو الحاج لعظما غتصور منو غ الضباب

لكريمي هو لي شاد لباريم تاع الوقت وغادي معاها كل وقت ووقتها ، وقت الشتا يقول للفلاح توكل على الله ولوح الزريعة وخا ياكلها غ الطير ومتگعدش بلاش ووقت الجفاف يقوليك دابا تزيان راه يبيتها فشان ويصبحها فشان ويعطيه الامل

لكريمي كان كايوقف ويتجمعو الناس ومن وجوههم كايعرف اشنو خصو يقوليهم ، كايشوف البؤس والقهرة ومنها كايخرج ليهم مواقف مضحكة وقصص دات عبرة ، حلقة مكتشبه لحلقة ، مكايكتب مكايوجد مكايحفض ، من وجوه الناس كايعرف اشخصهم وكايعرف اشضارهم وكايعرف احلامهم ومتمنياتهم ومخاوفهم وكوابيسهم وكايعرف التكرفيص والاقصاء لي عايشينو وكايخرجهم من هادشي كامل بنكتة ويخليهم يفرغو وينساو حتى للسوق الجاي

لكريمي عبر على الامية لي باقيا فلمغريب من قاليهم فواحد لحلقة قريو ولادكم راه العلم هو كلشي متخرجوهمش بحالي انا را سميتي يكتبوها ليا بتراكتور منعرفش نقراها ، ميساج تخسر عليه اموال واموال وبرامج وشلا مقالات ومتعرفش توصلو لناس البادية بصدق وتخليهم متحمسين يقريو ولادهم قنعهم لكريمي فحلقة غ بالضحك وداير يديه فجيبو

لكريمي كايوري للفلاح القاصح لي مكايعرف لامشاعير لا احاسيس لا حب لا رومنسية كايوريه كيفاش يغازل مراتو ويخليها تشعر انها انثى من قاليه وااااا لبغل را ماشي غ جي وركب را ماشي بهيمة هادي غادي تسوق عليها ، ميساج تعيا متعبر عليه فالمسلسلات عمرك غتوصلو بهاد الدقة فالوصف وبهاد السلاسة

لكريمي هو لي كايخلي المغربي لبسيط تاع لبادية يلبس احسن ماعندو وخا تكون جلابة مرقعة ويشد لمركوب باش يمشي للحلقة ومن كايرجع للدوار اسبوع وهو يعاود فيها ، بيها باش كايتغلب على قهر الحياة وقساوة الارض وهو كايضرب بلفاس والشتا قليلة ، ويضحك حتى لودنيه ويقول مسخوط هاد لكريمي گاليك الحاج نسى الطواف وناض يعلق للشيخة الناس رجمو الشيطان وهو جاي حازمو فوگ كتافو جايبو معاه ، ويضحااااااااك ويكمل تمارة

لكريمي هو الاصل هو التراب هو الحقيقة وهو الجدر ، لكريمي هو الطبيب النفساني تاع ناس مهمومة ومحگورة ومظلومة ، لكريمي هو لي كايمشي معروض لعرس ولد الحاج يضحك الناس فيه ويضحك الناس عليه على ولد الحاج ، زعما راك مغاتشرينيش بلمال وهادو لي جالسين يضحكو حسن ليا منك نتا وگطاراتك

درهم من هنا وربعين من لهيه ومياتريال من ديك الجيه دار بيهم عائلة وولاد كايضرب كيلوميترات باش يجيب ليهم طرفت الخبز وجامعهم

قاليك كي لفلالس تابعين امهم قاليك غادي وينبش ليهم فلارض باش ياكلو ، وصف دقيق جدا على كيفاش كايصور طرف ت الخبز ، عمرك تفهمو ولاتعرف ابعادو ايلا مكتعرفش الدجاجة من كتنوض على لبيض ملي يفقص ويخرجو لفلالس وتبدا تنبش فلارض وهوما تابعينها ياكلو ، من والو كتخرج ليهم القوت

لكريمي جزء من ذاكرة المغرب ، لكريمي هو المغرب الحقيقي

الله يرحم لكريمي والله يغفر ليه والله يجعل هاد الحادثة سببا في رحمة الله له وانا لله وانا اليه راجعون.